روتينك اليومي من مطبخك

روتينك اليومي من مطبخك

كلنا بنحب الطبيعة واللي بتقدمهولنا. بنستخدم حاجات كتير كطعام وشراب أو في حياتنا عموما. علشان كده لما بنيجي نعتني ببشرتنا أو حتى شعرنا بنحاول نستخدم مكونات طبيعية علشان نحس بالثقة والرضا. بس إزاي أقدر أحصل على المكونات دي من الطبيعة بسهولة؟

مش هنروح بعيد على فكرة علشان أغلب المكونات دي عندك! فين؟ في المطبخ الخاص بيكي! هتندهشي من كمية المكونات الموجودة في مطبخك واللي ممكن تفيدك في روتينك اليومي للعناية بالبشرة.

أنا هقدملك بعض المكونات اللي ممكن تلاقيها في مطبخك وتساعدك.

زيت جوز الهند: بيساعد على  ترطيب الشعر والجسم

أكيد سمعنا عن فوائد زيت جوز الهند بس عمرنا ما فكرنا نستخدمه غير في الطبخ. آن الأوان إننا نستفيد من الزيت الرائع ده كمرطب للشعر والجسم كله بأمان تام.

جربي ودلكي جسمك بزيت جوز الهند واستنى شوية علشان الجسم يمتصه. علشان كده يفضل وضعه قبل ميعاد النوم بفترة كافية وهتلاحظي فرق كبير في الترطيب.

 

2-البن المستخدم بعد القهوة : للتخلص من الجلد الميت والتقليل من السيلوليت

استرخي واشربي فنجان القهوة بس استني! ما تغسليش الفنجان وماترميش بواقي القهوة اللي فيه. تعالي نشوف إزاي بواقي القهوة هتفيد في العناية بالبشرة مع شوية سكر بني أو سكر عادي وملعقة زيت جوز الهند أو زيت زيتون وادهني جسمك بالخلطة دي.   ملمس الخليط ده رائع وبيساعد على الحصول على سكرب كويس لجلد أنعم بدون جلد ميت وكمان بيساعد على التقليل من آثار السيلوليت أوعلامات التمدد على الجسم.  ادهني جسمك بيه ودلكيه بحركات دائرية لأعلى واغسلي بعدها وهتلاحظي الفرق.

 

الزبادي: منعم ومرطب للجلد المتهيج

بنتعامل مع الزبادي كوجبة خفيفة صحية. ليه ما نحاولش نستخدمه علشان نحصل على جلد صحي كمان؟  يحتوى الزبادي على حمض اللاكتيك واللي بنلاقيه في بعض مستحضرات التجميل الخاصة بمحاربة الشيخوخة وعلامات التقدم في العمر. ده غير إننا ممكن نستخدهه للتخفيف من حروق الشمس وتبريدها. وأخيرا وليس آخرا استخدميه كقناع للوجه مع اضافة قليل من العسل.  ادهني بشرتك واتركيه دقايق  واحصلي على قناع مرطب طبيعي ومفيد جدا للبشرة, اغسلي بميه دافية وشوفي الفرق.

 

4-ثمرة الخيار: للتقليل من الانتفاخ والاحمرار تحت العينين

لما بنشوف صفحات السبا التجميلية على المواقع لازم نلاقي صورة لسيدة مسترخية وبيكون في ماسك على وشها وخيار على عينيها. عمرك سألتي نفسك ليه؟ أنا هقولك …الخضراوات طبعا مليانة فيتامينات والخيار بالذات يحتوى على حمض اسمه حمض الاسكوربك وده مسئول عن الحد من فقدان الميه اللي هي أساس حياة الجلد. اقطعي الخيارة دواير رفيعة وحطيها تحت عنيكي وسبيها لمدة من 10-15 دقيقة وهتلاقي إن الاحمرار والانتفاخ تحت عينيك قل ومع التكرار بيختفوا تماما.

ده كان رفيو المرة دي. تابعوني مع مقالة تانية عن الموضوع ده ومكونات تانية ان شاء الله.

 

 

 

 

 

 

 

 

 

 

 

 

 

 

 

 

 

سحر أبو السعود

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Social media & sharing icons powered by UltimatelySocial